Rijad – Nakon što je imala značajne susrete u Džiddi, Mekki i Medini, delegacija Islamske zajednice u Crnoj Gori je 06.09.2013.godine, imala susrete sa visokim zvaničnicima u Rijadu. Reis Rifat Fejzić se susreo sa ministrom vakufa (zadužbina) i vjerskih pitanja gdin Salih ibn Abdulaziz Alu Sejhom. Na sastanku je bilo riječi o pitanjima od zajedničkog interesa, a pored ministra, prisustvovao je i njegov zamjenik dr Abdulaziz bin Abdullah al-Ammar . Ministar vakufa i vjerskih pitanja je izrazio spremnost na saradnju Ministarstva vakufa i vjerskih pitanja sa Mešihatom Islamske zajednice u Crnoj Gori, rekavši da je počašćen posjetom reisa Fejzića i njegove delegacije, a da je pomaganje Islamskoj zajednici njihova i vjerska obaveza.
Tokom razgovora Reis Fejzić je upoznao gospodina ministra o aktivnostima Mešihata Islamske zajednice u Crnoj Gori, kao i o stanju muslimana rekavši da je Islamska zajednica u Crnoj Gori potpisala Ugovor o uređenju odnosa sa Vladom Crne Gore u kojom se garantuju prava muslimana na praktikovanje svoje vjere, što je ministra Salih ibn Abdulaziz Alu Šejha naročito dojmilo.
Nakon susreta zamjenik ministra vakufa i vjerskih pitanja je počastio goste iz Crne Gore impozantnim ručkom u tradicionalnom restoranu u Rijadu gdje su prisustvovali i direktori svih odsjeka u Ministarstvu.
Istog dana reis Fejzić je imao značajne susrete u Ministarstvu visokog obrazovanja gdje ga je primio zamjenik ministra dr Muhammed bin Abdulaziz al-Ohali koji je, nakon upoznavanja sa stanjem i prilikama muslimana u pogledu obrazovanja, obećao podršku ovog Ministarstva. Posebnu pažnju zamjenika ministra al-Ohalija je privukla činjenica da Islamska zajednica u Crnoj Gori ima srednju vjersku školu (medresu), tako da njeni učenici prema riječima domaćina mogu se školovati na svim univerzitetima u Kraljevini Saudijskoj Arabiji.
Delegaciju Mešihata Islamske zajednice u Crnoj Gori je naročito obradovao susret sa generalnim sekretarom Svjetske organizacije Islamske omladine Salih bin Sulejman al-Vuhejbijem u sjedištu Organizacije u Rijadu. “Za muslimane je najvažnije da svoju vjeru čuvaju kroz čuvanje jedinstva i poštivanja svojih relevantnih institucionalnih predstavnika, a glavni zadatak tih institucija je upravo rad sa omladinom”, naglasio je šejh Salih bin Sulejman al-Vuhejbi.
Posjeti visoke delegacije Islamske zajednice u Crnoj Gori posvetili su pažnju i saudijski mediji, od kojih izdvajamo:
- Članak iz časopisa “El-Jevm”
- Članak u novinama Rijad “Ministar vakufa primio reisa Islamske zajednice u Crnoj Gori”