Podgorica – U amfiteatru Medrese u Podgorici, danas je održan predramazanski sastanak svih imama i predsjednika odbora Islamske zajednice u Crnoj Gori. Ovim je nastavljena tradicija od ranijih godina, uz razliku što je ovoga puta sastanak uzeo oblik jednodnevnog savjetovanja, u cilju što bolje lične i profesionalne pripremljenosti imama za obaveze koje ih čekaju u toku mjeseca Ramazana.
Najprije izrazivši dobrodošlicu svim prisutnima, skup je otvorio reis Rifat ef. Fejzić. On je prisutne upoznao sa okvirnim planom aktivnosti, novinama koje su ove godine uvrštene u redovne aktivnosti Mešihata i Medrese u Podgorici.
Nakon toga, riječ je uzeo šejh Samih el-Džubbeh, koji se imamima obratio smjernicama kako da se imami najbolje pripreme za mubarek mjesec Ramazan. On je u svom nadahnutom govoru skrenuo pažnju da imamima da u svom djelovanju, često se trudeći da drugima ponude ljepote islama, upute ih na pravi put, itd., i u tom trudu zaborave sebe. Imami su prije svega ljudi, i moći će djelovati pozitivno na ljude onda kada sebe pripreme u duhu onog čemu pozivaju.
Zatim, rukovodilac Vjerskoprosvjetne službe, Enis ef. Burdžović je izložio detaljni plan ramazanskih aktivnosti koje je sačinila njegova služba. Od inovacija koje su predstavljene, valja pomenuti uslugu „Ramazanski telefon“. Ideja je da se telefonski broj distribuira u svim džematima, posredstvom imama, te da džematlije putem telefona mogu postaviti pitanja koja ih interesuju, i dobiti odgovore na njih.
U završnici savjetovanja, reis Rifat ef. Fejzić je imamima i predsjednicima odbora uručio po primjerak Buharijine zbirke hadisa. Ovi primjerci su Mešihatu Islamske zajednice poklonjeni od strane Islamskog kulturnog centra Kralj Fahd iz Sarajeva. Principom prioriteta, Mešihat se odlučio da su imami oni koji najprije trebaju imati najvjerodostojniju knjigu nakon Kur’ani-Kerima.